Eqazet.online theguardian-a istinadən xəbər verir ki,Şimali Koreya qoşunlarının Rusiya tərəfində Ukraynaya qarşı müharibədə döyüşmək üçün göndərildiyi, lakin son bir neçə həftə ərzində cəbhədə görünmədiyi bildirilir. Bu isə onların ağır itkilərdən sonra geri çəkildiyi ehtimallarını artırır. Bu barədə Cənubi Koreyanın Kəşfiyyat Xidməti məlumat yayıb.

Seulun Milli Kəşfiyyat Xidməti bu həftə mediada yayılan xəbərləri təsdiqləyərək, Şimali Koreya əsgərlərinin yanvar ayının ortalarında cəbhədən geri çəkildiyini bildirib.

Şimali Koreya 2024-cü ilin sonlarında təxminən 11,000 əsgərini Rusiyanın Kursk vilayətinə göndərməyə başlayıb. Bu addım Şimali Koreya lideri Kim Çen In ilə Rusiya prezidenti Vladimir Putin arasında bağlanan və ABŞ-ın rəhbərlik etdiyi “Qərb hegemoniyasına” qarşı birliyi gücləndirməyi hədəfləyən qarşılıqlı müdafiə paktından sonra atılıb.

Lakin onların iştirakı ciddi itkilərlə nəticələnib. Cənubi Koreya kəşfiyyat rəsmilərinin məlumatına görə, təxminən 300 Şimali Koreya əsgəri öldürülüb, 2,700 nəfər isə yaralanıb. Yanvar ayında Ukrayna prezidenti Volodimir Zelenski iki əsir Şimali Koreya əsgərinin görüntülərini paylaşmışdı. Onlardan biri komandirlərinin ona “təlim tapşırığına” göndərildiyini söylədiyini bildirmişdi.

Cənubi Koreya rəsmilərinin məlumatına görə, cəbhəyə göndərilməmişdən əvvəl heç vaxt döyüş təcrübəsi olmayan Şimali Koreya əsgərləri Ukraynanın çətin relyefi və döyüş şəraitinə hazır deyildilər. Onların Ukraynanın PUA hücumlarına qarşı xüsusilə həssas olduqları bildirilib.

Cənubi Koreya kəşfiyyatı iddia edir ki, öldürülən Şimali Koreya əsgərlərinin üzərindən qeydlər tapılıb. Bu qeydlərə əsasən, Pxenyan rejimi onların əsir düşməkdənsə intihar etmələrini gözləyirmiş.

Şimali Koreya qoşunlarının cəbhəyə gəlməsi müharibənin Ukrayna üçün daha təhlükəli mərhələyə keçə biləcəyi ilə bağlı narahatlıqları artırıb. Cənubi Koreya hərbi rəsmilərinin iddialarına görə, Pxenyan rejimi daha çox əsgər göndərməyi planlaşdırırdı.

Şimali Koreya döyüşçülər və hərbi texnika göndərməklə Rusiya tərəfindən qabaqcıl peyk texnologiyasına çıxış əldə etmək və öz nüvə, ballistik raket proqramlarını maliyyələşdirmək üçün xarici valyuta qazanmağı hədəfləyirdi.

Cənubi Koreyanın kəşfiyyat xidməti bildirir ki, Ukrayna qüvvələrinin 2024-cü ilin avqustunda başladığı gözlənilməz hücum fonunda Şimali Koreya əsgərlərinin ağır itkilər verməsi onların Kursk vilayətindən geri çəkilməsinin əsas səbəbi olub.

Vaşinqtondakı Strateji və Beynəlxalq Araşdırmalar Mərkəzinin eksperti Set Cons bu həftə bildirib ki, Rusiyanın “aşındırma müharibəsi” nəticəsində Şimali Koreya qoşunlarının yarıdan çoxu ya öldürülüb, ya da yaralanıb.

“İtkilər çox ciddi idi”, – deyə Cons bir podkastda bildirib. Yonhap xəbər agentliyinin məlumatına görə, o əlavə edib: “Bizim məlumatlarımıza görə, Şimali Koreya qüvvələrinin təxminən üçdə biri, hətta bəzi hesablamalara görə, 50%-ə qədər itki verib. Təxminən 1,000 nəfərin öldüyü ehtimal edilir. Bu, 11,000-12,000 nəfərlik bir qüvvə üçün çox böyük rəqəmdir.”

Şimali Koreya müharibədə iştirakını rəsmi olaraq qəbul etməsə də, Rusiya prezidenti Putin oktyabr ayında Şimali Koreya qüvvələrinin Rusiyaya gəlməsini təkzib etməmişdi. Şimali Koreyanın xarici işlər nazirinin müavini Kim Conq-Qyu isə bildirib ki, əgər belə bir yerləşdirmə olubsa, bu, beynəlxalq qanunlara uyğun həyata keçirilib.