Özbəkistanda hərbi məhkəmə Prezident Administrasiyasının informasiya siyasəti şöbəsinin keçmiş rəhbəri Komil Allamjonova qarşı sui-qəsd cəhdi ilə bağlı cinayət işinə baxmağa başlayıb.
Eqazet.online Gazeta.uz-a istinadla xəbər verir ki, bu barədə Özbəkistanın “Ezgulik” insan hüquqları cəmiyyətinin rəhbəri Abdurahmon Taşanov məlumat verib.
Onun sözlərinə görə, proses bağlı qapılar arxasında gedir. “Müttəhimlərin çoxluğuna, irəli sürülən ittihamların ciddiliyinə və işin ictimaiyyət üçün əhəmiyyətinə baxmayaraq, qeyri-müəyyənlik yenidən hökm sürür”, – o yazıb.
Gazeta.uz bununla bağlı Ali Məhkəməyə və Baş Prokurorluğa sorğular göndərsə də, heç bir cavab almayıb. Hərbi məhkəmə xəbərlərə münasibət bildirməyib.
Qeyd edək ki, oktyabrın 26-na keçən gecə Daşkənd vilayətinin Qibray rayonunda iki naməlum şəxs sürücü S.S. və Komil Allamjonovun olduğu “Range Rover” markalı avtomobilə bir neçə dəfə atəş açıblar; Faktla cinayət işi başlanıb.
İstintaq sui-qəsd cəhdində iştirak edən 7 nəfəri müəyyən edib. İstintaq zamanı 5 nəfər nəzarətə götürülüb, iki nəfər axtarışa verilib. Onlardan biri, İnterpol xətti ilə axtarışda olan Javlon Yunusov Koreya Respublikasında saxlanılaraq ekstradisiya edilib. İkinci, K.S. Qazaxıstanda aşkar edilib və onun iştirakı ilə istintaq hərəkətləri həyata keçirilib.
Cinayət işi çərçivəsində iki Rusiya vətəndaşı – Bislan Rasayev və Şamil Temirxanov da İnterpol xətti ilə axtarışa verilib. Onlar Özbəkistana qanunsuz giriş-çıxışda, cinayət barədə məlumat verməməkdə və odlu silahların qanunsuz dövriyyəsində ittiham olunurlar.
Çeçenistanın rəhbəri Ramzan Kadırov özünün Telegram kanalında bir neçə dəfə hadisəyə münasibət bildirib. Hər iki dəfə o, “çeçen izi”nin mövcudluğunu və bu işdə iştirakını inkar edib. Eyni zamanda, o, “bunu sui-qəsd cəhdi adlandırmaq çətindir” deyib və əlavə edib: “Əgər sui-qəsdi mən hazırlasaydım, məsələni sona çatdırardım”.
O, həmçinin Komil Allamjonovu və Prioritet Layihələr üzrə Milli Agentliyin (NAPP) direktoru Dmitri Lini hədələyib. Özbəkistan Ali Məclisinin Qanunvericilik Palatasının deputatı Odiljon Tojiyev Çeçenistan rəhbərinin təhdidlərini pisləyib.
