Eqazet.online xəbər verir ki,Fevralın 4-də Türkiyə Prezidenti Rəcəb Tayyib Ərdoğan Ankarada Suriyanın müvəqqəti prezidenti Əhməd Əl-Şaara ilə görüş keçirib. Bu, 2011-ci ildən bəri iki ölkə liderləri arasında ilk rəsmi görüşdür.
Görüş zamanı tərəflər Suriya ərazisində fəaliyyət göstərən kürd silahlı qruplarına qarşı birgə mübarizə məsələlərini müzakirə ediblər. Ərdoğan Türkiyənin həm İŞİD, həm də kürd militantlarına qarşı Suriyanın yeni rəhbərliyinə dəstək verməyə hazır olduğunu bildirib. O, həmçinin, Suriyada sabitlik artdıqca suriyalı miqrantların könüllü qayıdışlarının sürətlənəcəyinə inandığını ifadə edib.
Əl-Şaara isə Türkiyə ilə “strateji tərəfdaşlıq” qurmaq istədiklərini və regional təhlükəsizlik və sabitlik üçün birgə çalışmaq niyyətində olduqlarını qeyd edib. O, Ərdoğanı yaxın zamanda Suriyaya səfərə dəvət edib.
Görüşdə, həmçinin, iqtisadi əlaqələrin genişləndirilməsi və Türkiyə şirkətlərinin Suriya bazarına daxil olması məsələləri də müzakirə olunub. Bu, iki ölkə arasında münasibətlərin normallaşması istiqamətində mühüm addım kimi qiymətləndirilir.
Qeyd edək ki, Əl-Şaara Ərdoğanın jesti olaraq Dəməşqə göndərdiyi prezident təyyarəsi ilə Ankaraya gəlib.
