Böyük Britaniya Xarici İşlər Nazirliyi (XİN) Rusiya səfirini çağırıb və Rusiya diplomatının ölkədən çıxarılacağını elan edib.

Eqazet.online xəbər verir ki, nazirliyin bəyanatına görə, son bir il ərzində Rusiya Britaniya diplomatlarına qarşı getdikcə daha aqressiv və əlaqələndirilmiş təzyiq kampaniyası aparıb, onların işinə dair “əsassız və qərəzli ittihamlar” irəli sürüb.

XİN bildirib ki, bu həftə Rusiya Britaniya diplomatını və onun diplomatik fəaliyyət göstərən həyat yoldaşını ölkədən çıxarmaqla vəziyyəti daha da gərginləşdirib. Nazirlik bu addımı “tamamilə yalan və saxta ittihamlar” kimi dəyərləndirib və Rusiyanın Britaniyanın Moskvadakı səfirliyinin bağlanmasına təhrik etdiyini vurğulayıb.

Böyük Britaniya XİN-in sözçüsü bildirib ki, Rusiya səfirinin çağırılması zamanı rəsmi London açıq şəkildə Britaniya səfirliyinin əməkdaşlarına və onların ailələrinə qarşı hər hansı təzyiqin qəbulolunmaz olduğunu bildirib.

“Bu səbəbdən biz dərhal cavab tədbiri olaraq Rusiya diplomatının və onun həyat yoldaşının diplomatik akkreditasiyasını ləğv edirik. Bu qərarı yüngül qəbul etmirik, lakin Rusiyaya dəfələrlə bildirmişik ki, gərginliyi artıracağı təqdirdə biz də müvafiq addımlar atacağıq,” — deyə nazirlik sözçüsü əlavə edib.